 |
| Alardea Altzan. Marrazkia tamaina handian deskargatu. |
Alarde hitza arabierazko العرض (al-ˁarḍ) hitzetik dator, eta "erakustea" hitzez itzul liteke. Euskal Herrian, bi eginkizun aipatzeko erabili izan da: batetik, Antzinako Erregimeneko armadunen desfile militarrak; bestetik, armadunen desfile folklorikoak, formalki erakustaldi militarren antza zutenak.
Gaur egun, alardeak Euskal Herriko herri batzuetan egiten dira, jai giroan. Ezaugarri nagusia da gudari uniformedunez jantzitako pertsonek osatzen dutela, eta kaleetan zehar desfilatzen dutela.
Alardearen inguruan hitz egiten dugunean, Irungo eta Hondarribiko alardeak etortzen zaizkigu burura. Hala ere, Altzan ere alardea ospatzen zen, nahiz eta desfile militarra zen.
Foruek indarrean zirauten bitartean, ospakizun hauek ezinbestekoak ziren. Altzako alardea ospatzearen zentzua ulertzea erraza da: Lurralde Historikoen babesa biztanleen esku zegoen, ez zegoen babes indar profesionalik. Beraz, biztanleek beraien etxeak eta probintzia barneko eremuak defendatu behar zituzten. Edozein egoeraren aurrean eraginkortasuna ziurtatzeko eta indarra, tokiaren ezagutza eta defentsa egokia bermatzeko, urtean behin armen egoera ona eta bizilagunen prestakuntza saiatzeko alardea egiten zuten Altzako kaleetan zehar.
Altzako bizilagunek kontatu digutenez, tradizioz, 18 eta 60 urte bitarteko gizonek osatzen zuten erakustaldi militarra, arma zuriak edota suzkoak erabiltzen bazekitela frogatzeko. Emakumeek ez zuten erakustaldi militarretan parte hartzeko aukerarik.
Donostiako danborrada ere alardea ote den eztabaida dago, baina gehienen ustez segizio irrilaria da, okupazio frantseseko armadari burla egiteko.
Iruzkinak
Argitaratu iruzkina